“Манчестер Сити” Энсо Фернандес трансфери бўйича келишувга эришди
Англиянинг “Манчестер Сити” клуби “Челси” ярим ҳимоячиси Энсо Фернандес трансфери бўйича принципиал келишувга эришди. Бу ҳақда италиялик таниқли инсайдер Жанлука Ди Марсио маълум қилди.
Манбага кўра, томонлар музокаралар ўтказиб, аргентиналик футболчининг трансфери бўйича келишиб олган. Яқин вақт ичида Фернандес Манчестер шаҳрига бориб, трансферни якунлаш билан боғлиқ жараёнлардан ўтиши кутилмоқда. Ҳозирча трансфернинг аниқ қиймати расман маълум қилинмаган.
25 ёшли ярим ҳимоячи “Челси” сафида 2023-йилдан буён тўп тепиб келмоқда. Ўтган мавсум Англия Премьер-лигасида у 36 та учрашувда майдонга тушиб, 10 та гол урди ва 4 та голли узатма берди.
Маълумот учун, Энсо Фернандеснинг трансфер қиймати ҳозирда 100 миллион еврога баҳоланмоқда. Аргентиналик футболчи 2022-йилги Жаҳон чемпионатида терма жамоаси билан чемпион бўлган ва турнирнинг энг яхши ёш футболчиси деб топилган. “Челси” уни 2023-йил қишда “Бенфика”дан сотиб олган эди.
