“Манчестер Сити” эгалари ўзбек футболи клубини сотиб олмоқчи
Ўзбекистон Миллий олимпия қўмитасида “ОАВ ва Матбуот куни”га бағишланган тадбирда қўмита раиси биринчи ўринбосари Отабек Умаров жаҳон футболида катта нуфузга эга “City Football Group” компанияси ҳақида муҳим янгиликни маълум қилди.
Унинг сўзларига кўра, “Манчестер Сити” клуби эгалари нафақат яна бир ўзбекистонлик ёш иқтидорли футболчини трансфер қилишни, балки мамлакатимиздаги бир клубни тўлиқ сотиб олишни режалаштирмоқда.
Бу қарорга туртки бўлган асосий омил — Абдуқодир Хусановнинг “Манчестер Сити” сафига ўтиши. Умаров таъкидлашича, ушбу трансфердан сўнг нафақат Ўзбекистонда, балки бутун Марказий Осиёдаги футбол мухлислари инглиз клубига катта қизиқиш билдиришган.
“Абдуқодир Хусанов ‘Манчестер Сити’га ўтганидан сўнг, клубнинг мухлислари сони 100 миллионга ошди. Бу фақат 37–38 миллион аҳолиси бор Ўзбекистон эмас, балки қўшни давлатлар ҳам ўз мухлисларини қўшди”, — деди Умаров.
Унинг маълум қилишича, “City Football Group” ҳозирда Ўзбекистондаги маҳаллий клублардан бирини сотиб олиш бўйича музокаралар олиб бормоқда. Агар келишув амалга ошса, бу нафақат мамлакатимиз, балки бутун минтақа футбол тарихидаги илк глобал воқеа бўлади.
Мутахассислар фикрича, бундай қарор Марказий Осиё футболида кузатилаётган ўсиш, хусусан, Тожикистоннинг Осиё Кубогида плей-оффга чиққани ва Ўзбекистон терма жамоасининг Жаҳон чемпионатига йўлланмани қўлга киритгани билан боғлиқ.
Агар шартнома амалга ошса, бу ўзбек футболи учун янги имкониятларни очиб беради: клуб бошқаруви, инфратузилма, скаут тизими, академиялар ва медиаменежмент соҳаларида сифатли ўсиш кутилмоқда.
Ҳозирча қайси футболчи ва қайси клуб ҳақида гап кетаётгани аниқ эмас, бироқ эҳтимол, гап халқаро мусобақаларда ўзини кўрсата олган ёш истеъдод ҳақида бормоқда.
