“Манчестер Сити” “Барселона” ярим ҳимоячиси бўйича сўров юборди
“Манчестер Сити” “Барселона” ярим ҳимоячиси Френки де Йонгга қизиқиш билдирмоқда. Англия клуби нидерландиялик футболчининг трансфери бўйича Каталония жамоасига сўров юборган.
Маълумотларга кўра, “Манчестер Сити” 29 ёшли футболчини ёзги трансфер ойнаси ёпилишидан олдин таркибга қўшиб олиш имкониятини кўриб чиқмоқда. Ушбу қизиқиш ҳақидаги маълумотни журналист Хосе Алварес The Touchline нашрига берган.
Де Йонг айни пайтда жароҳати сабаб мавсум бошидаги учрашувларни ўтказиб юбормоқда. Унинг майдонга қайтиши куз охирларига тўғри келиши кутилмоқда. Шунингдек, “Барселона” бош мураббийи Ханс-Дитер Флик яқинда футболчини жамоа сардорлари рўйхатидан чиқарган.
Маълумот учун, Transfermarkt де Йонгнинг бозор қийматини 35 миллион евро деб баҳоламоқда. Нидерландиялик футболчи ўтган кузда “Барселона” билан шартномасини 2029 йилгача узайтирган.
