«Манчестер Сити» Андерсон трансфери бўйича рад жавобини олди, муқобил вариант — Тонали
«Манчестер Сити» клуби яримҳимоячи Эллиот Андерсон трансфери бўйича «Ноттингем Форест» билан музокараларни давом эттирмоқда, чунки инглиз клубининг биринчи таклифи рад этилган. Инсайдер Фабрицио Романонинг хабар беришича, «ўрмончилар» инглиз футболчиси учун 116 миллион евродан кўпроқ маблағ талаб қилмоқда.
Манбага кўра, агар Андерсон борасидаги келишув амалга ошмаса, «Ньюкасл» таянч яримҳимоячиси Сандро Тонали «Манчестер Сити» учун яхши вариантга айланиши мумкин.
Шунингдек, Лондоннинг «Арсенал» клуби ҳам италиялик футболчига қизиқиш билдираётгани айтилаяпти.
Тонали 2023 йилнинг ёзида «Милан»дан «Ньюкасл» сафига кўчиб ўтган эди. Ортда қолган мавсумда 26 ёшли футболчи барча мусобақаларда жами 53 та ўйинда майдонга тушиб, 3 та гол урди ва 7 та голли узатмани амалга оширди.
