«Ман Сити» сўнгги беш йил ичида илк бор «Энфилд»да «Ливерпул»ни мағлуб этди
Англия Премьер-лигасининг 25-тури доирасида «Манчестер Сити» сафарда «Ливерпул»ни 2:1 ҳисобида мағлуб этди. Шу тариқа, «шаҳарликлар» сўнгги беш йил ичида илк бор мерсисайдликлар устидан уларнинг ўз уйида ғалабага эришди.
Пеп Гвардиола шогирдларининг «Энфилд»да «қизиллар» устидан қозонган охирги ғалабаси 2021 йилнинг 7 февралига тўғри келган эди. Ўшанда АПЛнинг 23-тури доирасидаги баҳсда «шаҳарликлар» 4:1 ҳисобида йирик ғалабани нишонлашган.
Ўша ўйинда германиялик яримҳимоячи Илкай Гюндоган дубл қайд этган, қолган голларга Рахим Стерлинг ва Фил Фоден муаллифлик қилган эди. Мерсисайдликларнинг ягона жавоб тўпини 11 метрлик жарима зарбасидан Муҳаммад Салоҳ киритган.
Ўша вақтдан буён «Энфилд»да ўтказилган учрашувларнинг барчасида «Ливерпул» ғалаба қозонган, яна икки ўйинда эса жамоалар муроса йўлини танлашган эди.
