«Ман Сити» Антуан Семеньё учун курашга қўшилди
Ганалик футболчига, шунингдек, «МЮ», «Ливерпуль» ва «Тоттенҳэм» ҳам қизиқиш билдирмоқда.
ФОТО: Getty Images
«Борнмут» ҳужумчиси Антуан Семеньё қишки трансферлар вақтида бир нечта топ-клублардан расмий таклиф олиши мумкин. Бу ҳақда Sky Sports хабар берди.
Манбага кўра, 25 ёшли ганалик форвардга «Манчестер Юнайтед», «Ливерпуль» ва «Тоттенҳэм» ҳали ҳам жиддий қизиқмоқда. Шунингдек, «Манчестер Сити» ҳам Семеньёни харид қилиш вариантини кўриб чиқмоқда.
Семеньё жорий мавсумда барча мусобақалар доирасида 12 та ўйинда майдонга тушиб, 6 та гол ва 3 та голли узатма билан ўзини кўрсатди. Унинг клуб билан амалдаги шартномаси 2030 йилнинг ёзигача мўлжалланган.
Transfermarkt маълумотига кўра, футболчининг бозор қиймати 55 миллион еврони ташкил этади.
Насрулло Каримов
Журналист
