Маҳмуд Маҳамаджонов: Отам ва бошқа оила аъзоларим биринчи бўлиб хабар топишди
Хабарингиз бор, куни кеча “Андижон” жамоамизга иқтидорли футболчи Маҳмуд Маҳамаджонов қўшилди ва расман “Бургутлар”нинг аъзосига айланди.
Анталиядаги йиғинда машғулотларга киришган Маҳамаджонов клуб матбуот хизматининг саволларига жавоб қайтарди.
- Маҳмуджон, сиз энди “Бургутлар” оиласининг аъзосисиз. Буни ҳис қилганингизда нима ўйладингиз?
- Албатта, бу мен учун катта масъулият ва катта мақсадларим томон олиб борадиган имконият, деб умид қиламан. Энди бу ёғига доим ўсишда давом этишга ҳаракат қиламан.
- “Андижон” таклифини қабул қилишингизда нима жиддий сабаб бўлди?
- Бунга асосий сабаб жамоа олдига фақат катта мақсадлар қўйилаётгани ва шу йўлда катта ишлар қилинётганидир. Бундан ташқари, жамоа бош мураббийининг ўзи мени жамоада кўришни хоҳлаётгани “Андижон”ни танлашимга сабаб бўлди, деб ўйлайман.
- Янги жамоангизда биринчи ўртоқлик ўйинингизда ҳам майдонга тушдингиз. Илк таассуротлар қандай?
- Албатта, биринчи ўйин доим қийин кечади. Лекин, ўйлашимча, ҳаммаси яхши бўлди. Кучли жамоага қарши ўйнадик ва натижа ҳам қониқарли бўлди, деб ўйлайман.
- Бу ерга қандай мақсадларни кўзлаб келдингиз?
- Аввало, бу ерга “Андижон” билан Кубок ва совринларни ютушга келдим ва яна энг катта мақсадларимдан бири, шу ерда ўйнаб миллий терма жамоанинг доимий аъзосига айланиб, легионер бўлиш ва албатта мухлислар қалбидан яхши таассурот қолдириш.
- “Андижон”га ўтишингиз ҳақида биринчи бўлиб кимга айтдингиз?
- Менимча, ҳамма энг яқинларига айтади. Мен ҳам шундай қилдим: отам ва бошқа оила аъзоларим биринчи бўлиб хабар топишди.
- Бу клубдан илк таклифни эшитганингизда реакциянгиз қандай бўлди?
- Албатта, хурсанд бўлдим. “Андижон” катта жамоага айланиб бўлган.
- Футболдан завқланиш учун "Андижон" сизга идеал клубми?
- Ҳа, албатта. Менимча, футболдан завқ олиб ўйнаш учун “Андижон” энг зўрларидан. Бунда эса “Ультрас Бургут” мухлисларининг ўрни жуда беқиёс.
