Маласия «МЮ» спорт директори ҳаракатларидан кескин норози бўлди
«Манчестер Юнайтед» ҳимоячиси Тирелл Маласия клуб спорт директори Жейсон Уилкокснинг ҳаракатларидан кескин норози. Бу ҳақда The Mirror нашри хабар тарқатди.
Манбанинг таъкидлашича, айнан Уилкокс 26 ёшли нидерландиялик футболчининг қишки трансфер ойнасида жамоани тарк этишига тўсқинлик қилган.
talkSPORT маълумотларига кўра, трансфер ойнасининг сўнгги кунида футболчи «Бешиктош»га ўтишни якунлаш учун Туркияга учадиган самолётга чиқишига саноқли дақиқалар қолган эди. Бироқ Уилкокс жараёнга аралашиб, трансферни тўхтатган ва ҳимоячига «Манчестер Юнайтед»да қолишни буюрган.
Маласия жорий мавсумда деярли ўйин амалиётисиз қолмоқда. У Англия Премьер-лигасида бор-йўғи битта учрашувда майдонга тушиб, унда ҳам атиги икки дақиқа ҳаракат қилган. Футболчининг клуб билан амалдаги шартномаси шу ёзда ўз ниҳоясига етади.
