Мактоминайга Англиянинг учта клуби қизиқиш билдирмоқда
Италиянинг “Наполи” клуби ярим ҳимоячиси Скотт Мактоминай фаолиятини яна Англия Премьер-лигасида давом эттириши мумкин. Шотландиялик футболчига Англиянинг учта клуби қизиқиш билдирмоқда. Бу ҳақда журналист Экрем Конур хабар бермоқда.
Манбага кўра, 29 ёшли футболчини ўз сафига қўшиб олиш учун “Манчестер Юнайтед”, “Ньюкасл” ва “Астон Вилла” клублари даъвогарлик қилмоқда. Мактоминай келаси ёзда Италияни тарк этиши мумкин. Бунга унинг “Наполи” билан янги шартнома имзолаш эҳтимоли пастлиги сабаб қилиб кўрсатилмоқда.
Шотландиялик ярим ҳимоячининг Неаполь клуби билан амалдаги шартномаси 2028 йил ёзигача мўлжалланган. Шунга қарамай, футболчининг келажаги ноаниқлигича қолмоқда. Ҳозирча унинг трансфери бўйича расмий келишувга эришилгани ҳақида маълумот йўқ.
Маълумот учун, Скотт Мактоминай Италияга кўчиб ўтишидан аввал 20 йилдан ортиқ вақт давомида “Манчестер Юнайтед” тизимида фаолият юритган. Transfermarkt портали 29 ёшли футболчининг трансфер қийматини 40 миллион еврога баҳоламоқда.
