Максим Шацких: “Жаҳон чемпионати - Ўзбекистон учун ўзига хос имтиҳон”
Ўзбекистон миллий терма жамоаси собиқ ҳужумчиси ва ҳозирда “Андижон” клубини бошқараётган мутахассис Максим Шацких “Украина футболи” нашрига интервью берди.
Ҳамюртимиз суҳбат чоғида терма жамоамизнинг ўз тарихида илк бор Жаҳон чемпионати йўлланмасини қўлга киритгани ҳақида фикр билдириб, бош мураббий Темур Кападзенинг ишига баҳо берди.
- Ўзбекистон миллий терма жамоаси тарихда биринчи марта Жаҳон чемпионатида иштирок этади. Ўз миллий терма жамоангиздан бундай натижа кутганмидингиз?
- Албатта, терма жамоанинг Жаҳон чемпионатига чиқишини кутгандим. Бунинг вақти келганди. Қачондир бу иш содир бўлиши керак эди. FIFA Жаҳон чемпионатида Осиё жамоалари учун ўринлар сонини кўпайтиргани ҳам қўл келди.
Ўзбекистон гуруҳ босқичида анча ишончли ўйнади: ҳам ўйин томонлама, ҳам натижа томонлама. Яна бир устунлик жиҳати шундаки, кўплаб футболчилар ички чемпионатда эмас, балки хорижда тўп сурмоқда. Тажриба, яхши лигаларда ўйнаш ва меҳнатсеварлик – буларнинг барчаси ўз мевасини берди.
- Ўзбекистон миллий терма жамоасини анча ёш мутахассис – 43 ёшли Темур Кападзе бошқармоқда. Ушбу мураббийнинг иши ҳақида нима дея оласиз?
- Шахсан мен у билан ишлаганим йўқ, шунинг учун айтишим қийин. У Ўзбекистон терма жамоасини 2024 йилги Олимпиада ўйинларига тайёрлаганидан хабарим бор. Унинг қўл остида биз биринчи бор Олимпиадага чиқдик.
Кападзе 2025 йилнинг қишида миллий терма жамоа бошқарувини ўз қўлига олди ва унинг бошчилигида тўртта ўйин ўтказилди – иккита ғалаба, иккита дуранг. Келинг, кейин нима бўлишини кўрамиз. У терма жамоа футболида катта тажрибага эга.
Мураббий учун энг муҳим нарса нима? Натижа. Кападзе терма жамоага келганида ҳеч нарсани ўзгартирмади: ўша футболчилар, худди ўша схема бўйича ўйнашди. Ҳеч нарсани ўзгартиришдан фойда йўқ эди. Ўзбекистон ўз олдига қўйган вазифасини аъло даражада бажарди.
Энди биз Жаҳон чемпионатини кутамиз. Бу ҳам биз учун ўзига хос имтиҳон. Сайёрамизнинг энг яхши терма жамоалари иштирокидаги бундай турнирга биринчи марта бориш – бу биз учун бахт!”, – дейди Шацких.
Эслатиб ўтамиз, Ўзбекистон миллий терма жамоаси ЖЧ-2026 3-саралаш босқичининг “А” гуруҳида иккинчи ўринни эгаллаб, Жаҳон чемпионати йўлланмасини қўлга киритди.
