Максим Шацких: «Эртага кўзларимиз \"ёнган\" ҳолда майдонга тушамиз» (тўлиқ матбуот анжумани)
Эртага Ўзбекистон Суперкубоги доирасидаги “Насаф”-"Андижон" қарама-қаршилиги бўлиб ўтади. Ушбу ўйин олдидан “бурғутлар” бош мураббийи Максим Шацких матбуот анжуманида иштирок этди:
“Эртанги учрашув бошқа финаллар каби бир ўйиндан иборат бўлгани учун албатта қизиқарли бўлиши табиий ва ўйлайманки муҳит ҳам ажойиб бўлади. Стадион мухлисларимиз билан тўлиб-тошади деб умид қиламан. Андижонлик мухлислар кўз ўнгида яхши ўйин намойиш этиб, ғалаба қозонишга ҳаракат қиламиз. Битта ўйинлик финалда бор кучимизни берамиз ҳамда унчалик ҳам бой бўлмаган ”Андижон" клубининг тарихига ўз номимизни ёздириб қўйишни хоҳлаймиз. Бунинг учун қўлимиздан келган барча ишни қиламиз.
Мен учун бу нечинчи финал эканлиги аҳамяти йўқ ва бу ҳақида ўйламаяпман. “Пахтакор” билан икки марта Суперкубокда ўйнадим деган нарса ҳам хаёлимга келаётгани йўқ. Балки футболчилар учун бу қўшимча мотивациядир, лекин мен учун ундай эмас. Айтиб ўтганимдек, эртага кўзларимиз ёнган ҳолда майдонга тушамиз.
Мен келганимдан бери жамоа узоқ муддатдан бери ғалаба қозона олмаётган эди. Қўл остида биринчи баҳсни афсуски ютқаздик, аммо иккинчи учрашувда ғалаба қозондик. Бу тушкунликдан чиқиб кетишимиз керак эди. Финал олдидан бизга ғалаба керак эди. Эртанги ғалабадан кейин футболчилар янада яхшироқ кайфиятда майдонга тушади.
Балким бугун машғулотлардан кейин пеналтилар сериясини амалга ошириб кўрамиз, бироқ пеналтилар сериясига алоҳида тайёрланишни иложи йўқ. Буни машғулотда амалга ошириб бўлмайди.
Биз фақат стандарт вазиятларга урғу бермаяпмиз, балки аввалги мавсумда жамоада ишлаган мураббийлар штаби бу ишни қилгандир, лекин бизда ҳозирги кунда стандартлардан ташқари бошқа бир қатор қўшимча ишланмаларимиз бор. Агар бунга имконият бўлса, эртага синаб кўрамиз. Аниқ айтишим мумкинки, жамоамиз фақатгина стандартларга тайиниб ўйнамайди.
Мени фан-клуб ва мухлислар билан шахсан муносабатим жуда яхши. Улар билан ҳар куни кўришамиз ва суҳбатлашамиз. Балки, мен келишимдан аввал муносабат ёмон бўлгандир, лекин у энди тарих. Мухлислар билан суҳбатлашиб уларга айтган биринчи гапим бироз сабрли бўлишлари керак ҳақида бўлди. Бирданига келиб жамоада нимадирларни ўзгартиб юбриш жуда қийин, бунга вақт кераклигини уларга тушунтирдим ва улар ҳам табиийки бизни тушунишди. Биз ҳам мухлисларни ишончини оқлашга ва яхши ўйин кўрсатишга ҳаракат қиламиз. Мухлислар футболни яхши тушунишади ҳамда ғалабасиз ўйинлардан кейин салбий фикрлар билдиришлари табиий. Бошқа фан-клублар каби булар ҳам жамоа ғалаба қозонишини хоҳлайди.
Шахсий фикримча Дониёр Абдуманнопов ҳозирги кунда Ўзбекистондаги энг яхши ҳужумкор футболчи. Бу футболчини Миллий терма жамоага нима учун чақирилмаётгани мен учун бироз сюрприз ҳолат. Балки кейинроқ терма жамоа мураббийлари унга ҳам имконият беришади деган умиддаман.
Бахтимизга айрим футболчиларимиз жароҳатдан тузалиб сафимизга қайтишди, бироқ ҳали ҳам йўқотишлар мавжуд. Булардан бири Олег Затеев. У 21 жамоамизда ҳам катта футбол нафасини ҳис қилиб кўрган футболчилар бор. Балки имкони бўлса эртага уларга ҳам имконият берамиз.
Бизда Арвеладзе кетган, лекин Тойиров бор. У сафга қайтди. Ундан фойдаланишимиз мумкин. Таркибда, таянч ҳимоясида ва умуман олганда мен хоҳлаган футболчиларнинг ҳаммаси ҳам бор деб айта олмайман. Бор имкониятимиздан фойдаланишга мажбурмиз. Менга қолганда умуман бошқа услубдаги футболчиларни жамоага йиғган бўлар эдим, лекин бу ҳозирча мен қўлимдаги нарса эмас",-дейди мутахассис
