Макс Доумен АПЛда гол урган энг ёш футболчига айланди

«Арсенал» яримҳимоячиси Макс Доумен Англия Премьер-лигасининг 30-туридан ўрин олган «Эвертон»га (2:0) қарши учрашувда майдонга тушиб, гол уришга муваффақ бўлди.

Ушбу гол эвазига футболчи Премьер-лига тарихидаги энг ёш гол муаллифига айланди. Бу ҳақда мусобақанинг расмий X ижтимоий тармоғидаги саҳифасида хабар берилди.

Гол урилган вақтда футболчи 16 ёш-у 73 кунлик эди, бу эса янги рекорд натижа ҳисобланади. Бунгача мазкур рекорд 2005 йили «Эвертон» сафида 16 ёш-у 270 кунлигида гол урган Жеймс Вонга тегишли эди.

Айни дамда «Арсенал» 70 очко билан Англия чемпионати турнир жадвалида етакчилик қилмоқда.

Насрулло Каримов

Журналист