Мак Аллистер “Ливерпуль”нинг муносабатидан норози
“Ливерпуль” ярим ҳимоячиси Алексис Мак Аллистер клуб раҳбариятининг унга нисбатан муносабатидан норози эканини яширмади. Аргентиналик футболчи жамоадошлари Доминик Собослаи ва Райан Гравенберх билан янги шартномалар имзолангани, бироқ ўзига бундай таклиф берилмаганидан ҳафсаласи пир бўлганини айтди.
Мак Аллистернинг сўзларига кўра, унинг вакилларига “Ливерпуль” ҳозирча янги шартнома таклиф қилишга тайёр эмаслиги маълум қилинган. “Бу хабар мени жуда хафа қилди”, — деди 27 ёшли футболчи. Унинг амалдаги келишуви 2028 йил ёзигача мўлжалланган.
Аргентиналик ярим ҳимоячи ёзги трансфер ойнасида бошқа клубларга ўтиш имкониятлари бўлганини ҳам тасдиқлади. Шунга қарамай, у “Ливерпуль”да қолишни танлаган ва ҳозирги жамоаси учун бор кучини беришини таъкидлаган.
Маълумот учун, Мак Аллистер “Ливерпуль”га 2023 йил ёзида “Брайтон”дан келиб қўшилган. Жорий АПЛ мавсумида у учта учрашувда майдонга тушиб, ҳозирча гол ёки голли узатма қайд этмаган.
