Майкл Олизе Франция терма жамоасида XXI аср рекордини ўрнатди
Франция терма жамоаси ярим ҳимоячиси Майкл Олизе миллий жамоа сафида XXI аср учун янги натижа қайд этди. 24 ёшли футболчи 2026-йил давомида «уч ранглилар» сафида 9 та голли узатма берди. Бу ҳақда Stats Foot маълум қилди.
Олизе Миллатлар лигасининг 1-турида Туркияга қарши учрашувда навбатдаги ассистини амалга оширди. Унинг узатмасидан сўнг Килиан Мбаппе 54-дақиқада учрашувдаги ягона голни урди ва Франция сафарда 1:0 ҳисобида ғалаба қозонди.
Шу тариқа Олизе Франция терма жамоаси сафида бир календарь йилида 9 та голли узатма қайд этган 1958-йилдан буён илк футболчи бўлди. Бунгача бундай натижага афсонавий Раймон Копа эришган эди.
Маълумот учун, Олизе ЖЧ-2026да ҳам тарихий натижа қайд этган — у турнир давомида 7 та ассист амалга ошириб, бир мундиалдаги голли узатмалар бўйича Пеле номига тегишли рекордни янгилаган эди.
