Лукаку фаолиятини MLSда давом эттириши мумкин
АҚШнинг MLS чемпионатида иштирок этувчи «Атланта Юнайтед» клуби «Наполи» ҳужумчиси Ромелу Лукакуни ўз сафига қўшиб олиш учун ҳаракат бошлади. Бу ҳақда журналист Саша Тавольери ижтимоий тармоқда маълум қилди.
Манбага кўра, Америка клуби тажрибали бельгиялик форвард трансферига жиддий қизиқиш билдирмоқда. Айни вақтда томонлар ўртасида музокаралар давом этмоқда ва асосий эътибор футболчининг шахсий шартнома шартларини келишиб олишга қаратилган.
Аввалроқ Ромелу Лукакуга Туркиянинг икки йирик клуби — «Фенербахче» ва «Бешиктош» ҳам қизиқиш билдираётгани ҳақида хабарлар тарқалган эди. Бироқ ҳозирча MLS вакили ҳам ушбу трансфер учун жиддий курашга қўшилган.
Лукакунинг «Наполи» билан амалдаги шартномаси 2027 йил июнига қадар амал қилади. Бироқ ўтган мавсум у жароҳати сабабли мусобақаларнинг катта қисмини ўтказиб юборди. Натижада тажрибали ҳужумчи барча турнирларда атиги 7 та учрашувда майдонга тушиб, 1 та гол уришга муваффақ бўлди.
