Луис Энрике фаолиятини «Борнмут»да давом эттириши мумкин
Ҳозирда томонлар ўртасида музокаралар давом этмоқда.
ФОТО: Getty Images
Англиянинг «Борнмут» клуби трансфер бозорида фаолликни давом эттирмоқда. Бу сафар «албалилар» эътибор марказига Италиянинг «Интер» клуби яримҳимоячиси Луис Энрике Томас де Лима тушди. Бу ҳақда нуфузли инсайдер Николо Скира ўзининг X ижтимоий тармоғидаги саҳифасида хабар берди.
Скиранинг маълумотларига кўра, Англия клуби бразилиялик вингерни сотиб олиш мажбурияти билан ижарага олишни таклиф қилган. Келишувнинг умумий қиймати тахминан 18-20 миллион еврони ташкил этиши кутилмоқда. Айни дамда клублар ўртасидаги музокаралар қизғин давом этмоқда.
Маълумот учун, 24 ёшли футболчи жорий мавсумда «нерадзуррилар» таркибида етарлича ўйин амалиётига эга бўлаётган бўлса-да, самарадорлик борасида юқори натижа қайд эта олмади — 21 та ўйин, 1 гол, 1 ассист.
Насрулло Каримов
Журналист