Луис Энрике: «Де Дзерби — Лига 1'нинг энг кучли мураббийларидан бири»
«ПСЖ» бош мураббийи Луис Энрике Франция чемпионатининг 21-туридан ўрин олган «Марсель»га қарши баҳсдан сўнг рақиб жамоа устози Роберт Де Дзербининг ишига юқори баҳолади. Парижликларнинг 5:0 ҳисобидаги ғалабаси билан якунланган учрашувдан сўнг, Энрике италиялик мутахассисни Лига 1’нинг энг кучли мураббийларидан бири деб атади.
«Менга Де Дзерби ўз жамоаси ўйинини қандай қуриши жуда ёқади. У ғалабага йўналтирилган ҳужумкор футболни афзал кўради. Уни ҳозирги Франция биринчилигининг энг кучли мураббийларидан бири деб ҳисоблайман», — дея Энрикенинг сўзларини келтиради derbyderbyderby.it портали.
Маълумот ўрнида, Роберт Де Дзерби 2024 йилнинг ёзида «Марсель» бошқарувини қўлга олган эди. Унгача эса у «Брайтон», «Шахтёр», «Сассуоло», «Беневенто» ва «Палермо» каби клубларда фаолият юритган. Унинг қўл остида «провансаллар» жорий мавсумда 39 очко жамғариб, турнир жадвалининг тўртинчи поғонасида бормоқда.
