Логан Пол Сёрлотни танқид қилди: «Бу пасни бермасликнинг иложи йўқ эди»
Америкалик блогер, WWE юлдузи ва боксчи Логан Пол ЖЧ-2026 чорак финалида Норвегия терма жамоаси ҳужумчиси Александр Сёрлотнинг қарорини танқид қилди.
Логан Пол ижтимоий тармоқдаги саҳифасида Сёрлотнинг Эрлинг Холандга пас бермай, ўзи зарба берган вазиятига муносабат билдирар экан, норвегиялик футболчи тўғри қарор қабул қилмаганини таъкидлади.
«Бундай вазиятда пас бермасликнинг иложи йўқ эди. Бу катта хато бўлди», — деб ёзди Логан Пол.
Эслатиб ўтамиз, мазкур эпизод Норвегия Англияга қарши чорак финал учрашувида юз берган. Сёрлот қулай вазиятда бўш турган Эрлинг Холандга узатма бериш ўрнига ўзи зарба йўллаган, бироқ тўп ҳимоячига тегиб қайтган. Орадан кўп ўтмай Англия ҳисобни тенглаштириб, қўшимча бўлимларда 2:1 ҳисобига эга чиққан ва ярим финалга йўл олган.
Мазкур вазиятдан сўнг Сёрлот ижтимоий тармоқларда кескин танқид остида қолди. Футболчининг ўзи эса учрашувдан кейин дастлаб Холандга пас узатишни режалаштирганини, бироқ ҳимоячи узатма йўлини тўсиб қўйган деб ҳисоблагани учун зарба беришга қарор қилганини маълум қилган.
