Лофтус-Чик учун мавсум якунланди — манба
«Милан» яримҳимоячиси Рубен Лофтус-Чик Италия А Сериясининг 26-турида «Парма»га қарши баҳсда (0:1) олган оғир жароҳати сабабли жорий мавсумда бошқа майдонга туша олмаслиги мумкин.
Учрашувнинг 8-дақиқасида инглиз футболчиси Алексис Салемакерснинг узатмасидан сўнг тўп учун курашда рақиб дарвозабони Эдоардо Корви билан тўқнашиб кетди. Зарбада Лофтус-Чик майдонга қулади ва бўйни махсус корсет билан мустаҳкамланган ҳолда замбилда олиб чиқиб кетилди.
Sky Sport Italia хабар беришича, дастлабки тиббий кўрик натижалари қуйидагиларни аниқлади:
- Юқори жағда камида иккита тишнинг сингани;
- Пешона ва юз қисмида иккита чуқур яра;
- Ижобий жиҳати шундаки, футболчи ҳушини йўқотмаган ва унда мия чайқалиши кузатилмаган.
Яқин вақт ичида футболчи жағ-юз жарроҳлик амалиётини ўтади. Тишларни барқарорлаштириш учун махсус винтлар ёки пластиналар ўрнатилиши мумкин. Шунингдек, маълум муддат давомида футболчи фақат зонд орқали овқатланишига тўғри келади.
Ҳозирча Лофтус-Чикнинг майдонга қайтиши муддати номаълумлигича қолмоқда, чунки бундай жароҳат футболчилар учун хос эмас. Катта эҳтимол билан, «россонерилар» яримҳимоячиси учун мавсум якунланди.
