Loftus-Chik uchun mavsum yakunlandi — manba
«Milan» yarimhimoyachisi Ruben Loftus-Chik Italiya A Seriyasining 26-turida «Parma»ga qarshi bahsda (0:1) olgan og‘ir jarohati tufayli joriy mavsumda boshqa maydonga tusha olmasligi mumkin.
Uchrashuvning 8-daqiqasida angliyalik futbolchi Aleksis Salemakersning uzatmasidan so‘ng to‘p uchun kurashda raqib darvozaboni Edoardo Korvi bilan to‘qnashib ketdi. Zarbadan so‘ng Loftus-Chik maydonga quladi va bo‘yni maxsus korset bilan fiksatsiya qilingan holda zambilda olib chiqib ketildi.
Sky Sport Italia xabariga ko‘ra, dastlabki tibbiy ko‘rik natijalari quyidagilarni aniqladi:
- Yuqori jag‘dagi kamida ikkita tishning sinishi;
- Peshona va yuz qismidagi ikkita chuqur yara;
- Ijobiy holat shundaki, futbolchi hushini yo‘qotmagan va unda miya chayqalishi kuzatilmagan.
Yaqin vaqt ichida futbolchi jag‘-yuz jarrohlik amaliyotini o‘taydi. Tishlarni barqarorlashtirish uchun maxsus vintlar yoki plastinalar o‘rnatilishi mumkin. Shuningdek, ma’lum muddat davomida futbolchi faqat zond orqali ovqatlanishiga to‘g‘ri keladi.
Hozircha Loftus-Chikning maydonga qaytish muddati noma’lumligicha qolmoqda, chunki bunday jarohat futbolchilar uchun xos emas. Katta ehtimol bilan, «rossonerilar» yarimhimoyachisi uchun mavsum yakunlandi.
