“Ливерпул”нинг собиқ бош мураббийи Арне Слот УЕФАда янги лавозимга тайинланди
“Ливерпул”нинг собиқ бош мураббийи Арне Слот УЕФАнинг техник кузатувчилар гуруҳига қўшилди. Нидерландиялик мутахассис 2026/27-йилги мавсумда Европа клублари иштирокидаги мусобақаларни таҳлил қилиш билан шуғулланади. Бу ҳақда УЕФА расмий сайти хабар бермоқда.
Манбага кўра, Слот Европа Чемпионлар лигаси учрашувларини кузатиб, жамоаларнинг тактик услублари ва мураббийлар қўллаётган янги ёндашувларни ўрганади. У статистик маълумотлар ҳамда видеолавҳалар асосида техник ҳисоботлар тайёрлашда иштирок этади.
УЕФАнинг техник кузатувчилар гуруҳидан Эрик тен Хаг, Оле-Гуннар Сулшер, Гарет Саутгейт, Томас Франк ва Рафаэл Бенитес каби таниқли мутахассислар ҳам ўрин олган. Мазкур лавозим бевосита мураббийлик фаолиятини назарда тутмайди. Слотнинг асосий вазифаси ўйинларни таҳлил қилиш ва футбол тактикаси ривожига оид хулосалар тайёрлашдан иборат бўлади.
Маълумот учун, Арне Слот 2024-йилда “Ливерпул” бош мураббийи этиб тайинланган ва илк мавсумиданоқ жамоани Англия Премьер-лигаси чемпионлигига олиб чиққан. У 2026-йилнинг ёзида клубни тарк этган. Мутахассис аввалроқ “Фейеноорд” билан Нидерландия чемпионлигини қўлга киритган ва 2022-йилда УЕФА Конференциялар лигаси финалига чиққан.
