Ливерпулда параддан кейин машина омма орасига кириб кетди – жабрланганлар бор
Ливерпул шаҳрида АПЛ ғолибига айланган «Ливерпул» клуби шарафига ўтказилган тантанали параддан кейин йўл-транспорт ҳалокати содир бўлди. Парадда бир миллиондан ортиқ мухлислар қатнашган.
The Guardian нашрининг хабар беришича, парад якунланганидан сўнг кўп ўтмай, юқори тезликда ҳаракатланиб келган қора минивэн одамлар тўпланган жойга кириб кетган. Гувоҳларнинг сўзларига кўра, ҳайдовчи ҳеч қандай сигнал бермаган ва бир неча кишиларга тўқнашганидан сўнг югуриб қочишга уринган. Шу пайтда унинг ҳаракатлари яна бир бор одамларга урилишига олиб келган.
«Бу ҳақиқий даҳшат эди. Фақат зарбалар ва бақир-чақирларни эшитдик», — деди гувоҳ Гарри Рашид PA Media нашрига берган интервьюсида. Унинг таъкидлашича, бир неча киши ҳушидан кетган, оғир жароҳатланганлар ҳам бор.
Полиция 53 ёшли Ливерпуллик бир шахсни ушлаб қолган. Унга нисбатан тергов ишлари бошланган, аммо ҳозирча у ҳайдовчи эканлиги расман тасдиқланмаган. Тергов давом этмоқда.
