«Ливерпул» Жотани туғилган куни муносабати билан хотирлади
«Ливерпул» бугун ўз собиқ ҳужумчиси Диогу Жотани хотирлади. 4-декабрь куни португалиялик футболчи 29 ёшини нишонлаган бўларди. Эслатиб ўтамиз, 2025 йил 3 июль санасида Жота ва унинг укаси Андре йўл-транспорт ҳодисасида ҳалок бўлганди.
«Бугун ҳам, ҳар куни бўлгани каби, биз Диогу Жотани ёдга оламиз. У бугун 29 ёшга тўлган бўларди. Бутун меҳримиз, ўй-хайолларимиз ва дуоларимиз унинг рафиқаси Руте, ота-онаси, яқинлари, дўстлари ва укаси Андре билан. У абадий қалбимизда қолади, абадий бизнинг 20-рақамимиз», — дейилади клубнинг расмий ижтимоий тармоқлардаги баёнотида.
Португалиялик ҳужумчи 2020 йилдан бошлаб «Ливерпул» шарафини ҳимоя қилган. Жамоа таркибида у Англия чемпиони бўлган, шунингдек, Англия Кубоги ва Лига Кубогини қўлга киритган. Унинг вафотидан сўнг клуб 20-рақамни муомаладан чиқарган.
