«Ливерпуль» ва «Манчестер Юнайтед» Тчуаменига қизиқиш билдирмоқда
"Ливерпуль" ва "Манчестер Юнайтед" Мадриднинг "Реал" клуби таянч ярим ҳимоячиси Орелен Тчуаменига назар ташламоқда. Агар "қаймоқранглилар"нинг эҳтимолий янги бош мураббийи ўйинчини сотишга қарор қилса, ҳар икки клуб ҳам 26 ёшли футболчини қўлга киритишга бўлган қизиқишини кучайтириши мумкин. Бу ҳақда Caught Offside хабар бермоқда.
Манбага кўра, француз ярим ҳимоячисининг амалдаги шартномаси яна икки йилга мўлжалланганини инобатга олган ҳолда, унинг хизматларига қизиқиш билдираётган клублар тахминан 80-90 миллион евро тўлашларига тўғри келади. Таъкидланишича, "Реал" раҳбарияти Тчуамени билан шартномани 2031 йилгача узайтиришни режалаштирмоқда.
Жорий мавсумда ярим ҳимоячи барча мусобақаларда 45 та ўйинда иштирок этиб, иккита гол ва иккита голли узатмани ўз ҳисобига ёздириб қўйди. Transfermarkt порталидан келтирилган маълумотларга кўра, футболчининг бозор қиймати 75 миллион еврони ташкил этади.
