“Ливерпул” ва “Арсенал”га Макси Араухони сотиб олиш таклиф қилинди
Португалиянинг “Спортинг” клуби чап қанот ҳимоячиси Макси Араухо ёзги трансфер ойнасида Англияга кўчиб ўтиши мумкин. The Sun хабарга кўра, футболчи хизматлари “Ливерпул” ва “Арсенал”га таклиф қилинган.
Манбага кўра, “Спортинг” уругвайлик футболчини 51,5 миллион фунт стерлинг эвазига қўйиб юборишга тайёр. Лиссабон клуби аллақачон унинг ўрнини босиши мумкин бўлган номзодларни излашни бошлаган.
26 ёшли Макси Араухо ўтган мавсум Португалия чемпионатида 5 та гол ва 4 та голли узатмага муаллифлик қилди. У асосан чап қанот ҳимоячиси сифатида ҳаракат қилса-да, зарурат туғилганда чап қанот ҳужумчиси вазифасини ҳам муваффақиятли бажара олади. Айни шу универсаллиги сабабли у Премьер-лига грандларининг эътиборини тортган.
Ҳозирча на “Ливерпул”, на “Арсенал” расмий таклиф билан чиққан. Бироқ ҳар икки клуб футболчининг трансфери бўйича вазиятни синчковлик билан ўрганмоқда ва яқин кунларда якуний қарорини қабул қилиши кутилмоқда.
