“Ливерпуль” Рио Нгумоа билан янги шартнома бўйича келишувга эришди
“Ливерпуль” ўзининг энг иқтидорли ёш футболчиларидан бири Рио Нгумоа билан ҳамкорликни узоқ муддатга давом эттиришга тайёрланмоқда. TEAMtalk маълумотига кўра, мерсисайдликлар 18 ёшли вингер билан янги шартнома бўйича принципиал келишувга эришган.
Янги битимнинг аниқ муддати ва молиявий тафсилотлари ҳозирча ошкор қилинмаган. Бироқ келишув узоқ муддатга мўлжалланиши ва футболчининг клубдаги ўсиб бораётган мақомига мос равишда шартлари сезиларли яхшиланиши кутилмоқда. “Ливерпуль” яқин вақт ичида янги шартномани расман эълон қилиши мумкин.
Нгумоа 2024-йилда “Челси” академиясидан “Ливерпуль”га кўчиб ўтган. Ёш футболчи қисқа вақт ичида асосий жамоага етиб борди ва клуб раҳбарияти уни келажакдаги муҳим футболчилардан бири сифатида кўрмоқда. Аввалроқ унга “Бавария” ҳам қизиқиш билдиргани ҳақида хабарлар тарқалган эди.
Маълумот учун, Нгумоа 29-август куни 18 ёшга тўлди. Унинг амалдаги шартномаси 2028-йилгача мўлжалланган, Transfermarkt эса футболчини 30 миллион еврога баҳоламоқда. Жорий АПЛ мавсумида у икки учрашувда майдонга тушган.
