«Ливерпуль» Пулишичга қизиқиш билдирмоқда
Англиянинг «Ливерпуль» клуби Италиянинг «Милан» жамоаси ҳужумчиси Кристиан Пулишичнинг трансфери бўйича қизиқиш билдирмоқда. Бу ҳақда таниқли журналист Николо Скира ўзининг ижтимоий тармоқлардаги саҳифасида маълум қилди.
Мерсисайдликлар АҚШ терма жамоаси аъзосининг «Милан»даги ҳолатини диққат билан кузатиб боришмоқда. Футболчининг амалдаги шартномаси 2027 йилгача мўлжалланган бўлиб, унинг йиллик маоши 4 миллион еврони (қўшимча 1 миллион евро бонуслар билан) ташкил этади.
Шунингдек, «Милан» келишувни бир томонлама тартибда 2028 йилгача узайтириш ҳуқуқига эга. Скиранинг қайд этишича, Пулишич Миландаги фаолиятидан мамнун бўлса-да, у клубдан янги шартнома таклифини кутган, бироқ «россонерилар» раҳбарияти ҳозирча бу масалада ташаббус кўрсатмаган.
Жорий мавсумда 27 ёшли футболчи Италия чемпионатида 16 та учрашувда майдонга тушиб, 8 та гол ва 2 та голли узатмага муаллифлик қилди. Шунингдек, унинг ҳисобида Италия Кубоги доирасидаги 3 та ўйинда киритилган 2 та гол ҳам бор.
