«Ливерпуль» ПСЖдан 18 ёшли иқтидорни сотиб олиши мумкин — манба
Ўйинчининг клуб билан амалдаги меҳнат шартномаси 2028-йилнинг ёзига қадар мўлжалланган.
ФОТО: Getty images
“Ливерпуль” ПСЖнинг 18 ёшли қанот ҳужумчиси Иброҳим Мбайени қўлга киритиш учун курашда етакчилик қилмоқда. Сенегаллик вингер келаси ёзда Франция грандини тарк этиши мумкин, чунки у ўйин вақтининг камлигидан норози. Бу ҳақда Caught Offside хабар бермоқда.
Манба маълумотларига кўра, Мбайега “Манчестер Сити”, “Вест Ҳэм Юнайтед” ва “Брайтон” ҳам қизиқиш билдирмоқда.
Жорий мавсумда Мбайе барча мусобақаларда 28 та ўйинда иштирок этиб, битта гол ва иккита голли узатма муаллифига айланди. Ўйинчининг клуб билан амалдаги меҳнат шартномаси 2028-йилнинг ёзига қадар мўлжалланган. Transfermarkt порталида тақдим этилган маълумотларга кўра, футболчининг бозор қиймати 30 млн еврони ташкил этади.
Розикжон Султонмуродов
Журналист