«Ливерпул» нега Юрген Клоппни ортга қайтармоқчи эмаслиги маълум бўлди
The Telegraphнинг ёзишича, «Ливерпул» ҳозирги қийин вазиятга қарамай, немис мутахассиси Юрген Клоппни қайтариб олиб келиши жуда эҳтимолдан йироқ. Мерсисайдликлар мавсум бошидан буён Арне Слот бошчилигида барқарор ўйин намойиш эта олмаяпти, бироқ клуб раҳбарияти мураббий алмашинуви масаласига шошилмаяпти.
Манбага кўра, Клоппнинг потенциал қайтишига бир нечта омиллар тўсқинлик қилмоқда. Аввало, у билан клуб раҳбарияти — хусусан, Майкл Эдвардс ва Жулиан Уорд ўртасидаги айрим келишмовчиликлар ҳали ҳам долзарблигича қолган.
Шунингдек, «қизиллар» раҳбарлари футболчи ва мураббийлар фаолиятида тушкун даврлар бўлишини, бу эса Слотга ишончни сақлаб қолиш учун асос бўлиши мумкинлигини тушуниб турибди. Бундан ташқари, клуб 2024 йил ёзида нидерландиялик мутахассисни «Фейеноорд»дан олиб келиш учун 8 миллион евро тўлаганини ҳам инобатга олмоқда.
Яна бир муҳим жиҳат — Клопп ҳозирча мураббийлик фаолиятига қайтмаган бўлса-да, «RB Лейпциг»да халқаро алоқалар бўйича директор лавозимида ишлаб келмоқда.
Эслатиб ўтамиз, Юрген Клопп «Ливерпул»ни 2015 йилдан 2024 йилгача бошқарган. Англия чемпионатининг жорий мавсумидаги 12 турдан кейин мерсисайдликлар 18 очко билан 13-ўринни эгаллаб турибди.
