«Ливерпуль» Ливраменто учун курашга қўшилди
«Ливерпуль» клуби «Ньюкасл»нинг қанот ҳимоячиси Валентино Ливраментога қизиқиш билдирмоқда. Футболчи «Зағизғонлар» билан янги шартнома борасида келиша олмаган, шу сабабли жорий ёзда унинг сотилиши эҳтимоли юқори. Бу ҳақда журналист Бен Жейкобс маълум қилди.
Манбага кўра, «Ньюкасл» 23 ёшли футболчининг сотувидан тахминан 70 миллион фунт стерлинг (80 миллион евро) ишлаб олмоқчи. Шу билан бирга, инглиз футболчиси учун курашда мерсисайдликларга «Манчестер Сити» ва «Арсенал» клублари рақобат туғдириши мумкин.
Жорий мавсумда Ливраменто барча турнирларда жами 26 та ўйинда иштирок этиб, ўз ҳисобига битта самарали узатмани ёздириб қўйди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt портали маълумотларига кўра, ҳимоячининг бозор қиймати 40 миллион еврога тенг.
