«Ливерпуль» кетма-кет тўртинчи ғалабасини қўлга киритди
Англия Премьер-лигасининг 28-туридан ўрин олган баҳсда «Ливерпуль» «Вест Хэм Юнайтед» устидан 5:2 ҳисобига ишончли ғалабани қўлга киритди. Шу тариқа, мерсисайдликлар барча мусобақаларда кетма-кет тўртинчи ғалабасини расмийлаштиришди.
Арне Слот шогирдларининг ушбу муваффақиятли серияси Англия чемпионатининг 26-турида «Сандерленд» устидан қозонилган ғалаба (1:0) билан бошланган эди. Шундан сўнг «қизиллар» Англия Кубогининг тўртинчи раундида «Брайтон»ни йирик (3:0) ҳисобда мағлуб этишди. Сўнгра АПЛ доирасида «Ноттингем Форест» (1:0) ва «Вест Хэм» жамоалари устидан зафар қучилди.
Мерсисайдликлар навбатдаги учрашувни 3 март куни АПЛнинг 29-тури доирасида сафарда «Вулверхэмптон»га қарши ўтказишади. Айни дамда «Ливерпуль» 48 очко жамғарган ҳолда Премьер-лига турнир жадвалининг бешинчи поғонасини банд этиб турибди.
