«Ливерпуль» Илья Забарнийга қизиқиш билдирмоқда
Украина миллий жамоаси ва «ПСЖ» ҳимоячиси Илья Забарний Англиянинг «Ливерпуль» клуби қизиқиш доирасига тушди. Бу ҳақда Франциянинг Foot01 нашри хабар берди.
Манбага кўра, сўнгги ҳафталарда футболчининг вакиллари Забарний номзодини мерсисайдликларга таклиф қилган ва клуб билан дастлабки музокаралар ҳам ўтказилган.
«Ливерпуль»нинг ҳимоячига бўлган қизиқиши жамоа бош мураббийи Андони Ираола билан боғлиқ. Испаниялик мутахассис Забарнийнинг имкониятларини яхши билади, чунки улар аввалроқ «Борнмут»да бирга фаолият олиб боришган.
Шу билан бирга, ушбу трансферни амалга ошириш осон кечмаслиги таъкидланмоқда. Чунки «ПСЖ» Забарнийни ўтган ёзда «Борнмут»дан 57 миллион еврога сотиб олган ва жиддий таклифсиз футболчини қўйиб юбориш ниятида эмас.
Илья Забарний 2025 йил ёзида «ПСЖ» сафига қўшилган. У ҳозирга қадар парижликлар таркибида 37 та учрашув ўтказиб, 1 та гол урган.
Transfermarkt маълумотларига кўра, 23 ёшли ҳимоячининг бозор қиймати 40 миллион еврога баҳоланмоқда. Унинг «ПСЖ» билан амалдаги шартномаси 2030 йил ёзигача мўлжалланган.
