«Ливерпул» Хитойда 22-чакана савдо дўконини очди
Англиянинг «Ливерпул» клуби жорий ҳафта Хитойнинг Шенчжен шаҳрида ўзининг 22-расмий чакана савдо дўконини очди. Бу ҳақда The Athletic нашри хабар бермоқда.
Манбага кўра, дунёдаги ҳеч бир бошқа футбол клуби ёки Америка спорт франчайзаси бундай кенг глобал савдо тармоғига эга эмас.
«Ливерпул»нинг бугунги молиявий барқарорлиги америкалик Fenway Sports Group инвестицион компанияси фаолияти билан чамбарчас боғлиқ. Мазкур компания 2010 йилда клубни ўз назоратига олган эди.
Шундан сўнг Fenway Sports Group клубни тубдан ислоҳ қилишни йўлга қўйди — инфратузилмани яхшилаш, жамоанинг спорт стратегиясини кучайтириш ва молиявий ҳолатни соғломлаштириш борасида изчил ишлар олиб борилди.
Янги ҳомийлик шартномалари, маркетинг сиёсасини ривожлантириш ҳамда майдондаги муваффақиятли натижалар эвазига клубнинг даромадлари ошди, қарзлари камайди ва тижорий кўрсаткичлари анча яхшиланди.
Молиявий барқарорлик давридан сўнг «Ливерпул» йирик спорт ютуқларига эришди — Чемпионлар лигаси ва Англия Премьер-лигасида ғалаба қозониб, яна жаҳон футболидаги энг кучли клублар қаторига қайтди.
