«Ливерпул» «Герта»нинг 16 ёшли иқтидорини сотиб олмоқчи
Англиянинг «Ливерпул» клуби Германиянинг «Герта» жамоасига 16 ёшли таянч ярим ҳимоячиси Кеннет Айгхорн бўйича расмий таклиф тайёрлашни режалаштирмоқда. Бу ҳақда машҳур журналист ва инсайдер Флориан Плеттенберг ўзининг ижтимоий тармоқдаги саҳифасида хабар берди.
Манбанинг маълум қилишича, «Ливерпул» скаутлари жорий мавсумда Айгхорннинг ўйинларини диққат билан кузатиб боришган ва унинг ҳаракатларидан катта таассурот олишган. Берлин клуби ёш иқтидор эгасини жамоада олиб қолиш қийин бўлишини тушуниб турибди ва уни 12 миллион евро эвазига қўйиб юборишга тайёр.
Ушбу мавсумда Кеннет Айгхорн «Герта» сафида 20 та учрашувда майдонга тушиб, 2 та гол уришга эришди. Transfermarkt портали берётган маълумотларга кўра, ёш футболчининг айни дамдаги бозор қиймати 20 миллион евронни ташкил этади.
