«Ливерпуль» Диоманд трансфери бўйича музокараларни бошлади
Англиянинг «Ливерпуль» клуби «РБ Лейпциг» вингери Ян Диоманд трансфери бўйича Германия клуби билан музокараларга киришди. The Athletic нашрининг хабар беришича, мерсисайдликларда ушбу футболчи билан шартнома имзолаш имконияти «ПСЖ»га нисбатан юқорироқ баҳоланмоқда.
Манбага кўра, «Лейпциг» 19 ёшли футболчи сотилмаслигини ва клуб ўз позициясини ўзгартириш учун 130 миллион евро ёки ундан ортиқ таклиф кераклигини бир неча бор таъкидлаган. Ўтган ёзда «Ливерпуль» трансферлар учун 522 миллион евро сарфлагани ҳамда бошқа позицияларни ҳам кучайтириш зарурлигини ҳисобга олса, инглизлар бу ўйинчини сотиб олишни истамасликлари ҳам мумкин.
Диоманднинг «РБ Лейпциг» билан шартномаси 2030 йилгача мўлжалланган ва унда шартномани муддатидан аввал бекор қилиш ҳақида банд мавжуд эмас. «ПСЖ» ҳам футболчига катта қизиқиш билдираётгани айтилмоқда, бироқ ҳозирча бу борада «Ливерпуль» каби илгарилай олгани йўқ. Шунингдек, футболчини ўзига жалб қилмоқчи бўлганлар қаторида «Манчестер Сити» ҳам бор.