«Ливерпул» Бредли Баркола учун илк таклифни тайёрламоқда
«Ливерпул» ПСЖ қанот ҳужумчиси Бредли Барколани қўлга киритиш учун дастлабки таклифни тайёрламоқда. Мерсисайд клуби 23 ёшли франциялик футболчи билан принципиал келишувга эришгани айтилмоқда.
Баркола «Энфилд»да Муҳаммад Салоҳнинг ўрнини эгаллаши мумкин бўлган асосий номзод сифатида кўрилмоқда. Энди «Ливерпул» ва ПСЖ трансфер суммаси борасида келишиб олиши керак.
«Ливерпул» Салоҳга ўринбосар изламоқда
BBC хабарига кўра, «Ливерпул» Барколага бўлган қизиқишини кучайтирган ва футболчи учун илк расмий таклиф устида ишламоқда. Клуб ўтган мавсум охирида жамоани тарк этган Муҳаммад Салоҳ ўрнига айнан ПСЖ вингерини асосий вариант сифатида белгилаган.
Аввалига «Ливерпул» Ян Диомандени сотиб олишни режалаштирган эди. Бироқ «РБ Лейпциг» футболчиси «Реал»га ўтишга яқин турибди. Шу сабабли мерсисайдликлар эътиборини тўлиқ Баркола трансферига қаратган.
ПСЖ эса футболчисини арзон қўйиб юбормоқчи эмас. Франция чемпиони Барколани тахминан 145 миллион фунтга баҳоламоқда. Бу сумма амалга ошса, Британия футболи трансфер рекордини янгилаши мумкин.
Баркола «Энфилд»га ўтишга тайёр
Барколанинг ПСЖ билан амалдаги шартномаси 2028-йилгача мўлжалланган. Шунга қарамай, футболчи «Ливерпул»га ўтишга қизиқиш билдирмоқда.
Франциялик вингер фаолиятида янги босқичга чиқишни ва Премер-лигада ўзини синаб кўришни истамоқда. Сўнгги вақтларда у Париж клубида муҳим ўйинларда кўпроқ захирадан майдонга тушгани сабаб вазиятдан норози бўлиб қолган.
Баркола мунтазам асосий таркибда ўйнашни ва янги чақириқни хоҳламоқда. У яқинда «Ливерпул» бош мураббийи Андони Ираола ҳамда клуб раҳбарияти вакиллари билан ижобий музокаралар ўтказган. Футболчи ПСЖ билан шартномасини узайтириш ниятида эмаслигини ҳам билдирган.
Трансфер нархида катта тафовут бор
Футболчи билан принципиал келишувга эришилган бўлса-да, трансферни якунлаш осон бўлмайди. Асосий муаммо — ПСЖ талаб қилаётган катта сумма.
«Ливерпул» келишувни тахминан 100 миллион фунт атрофида амалга оширишни истамоқда. ПСЖ эса ўз позициясида қатъий турибди ва Баркола учун 145 миллион фунт талаб қилмоқда.
Клублар ўртасида катта молиявий тафовут бор. Бироқ футболчининг»га ўтишни истаётгани инглиз клубига музокараларда устунлик бериши мумкин.
23 ёшли ҳужумчи «Ливерпул» билан шахсий келишуви музокараларни тезлаштиришига умид қилмоқда. Ҳозирча томонлар ўртасида расмий шартнома имзоланмаган.
