Лионель Месси Жаҳон чемпионатларидаги нойоб рекордлардан бирини такрорлади
Аргентина терма жамоаси ҳужумчиси Лионель Месси ЖЧ-2026 доирасидаги дастлабки икки ўйинда бешта гол уришга муваффақ бўлди. Аргентиналик юлдуз Жазоирга қарши учрашувда (3:0) хет-трик қайд этган бўлса, Австрия билан баҳсда (2:0) дубл муаллифига айланди. Шу тариқа, Месси жаҳон биринчилигидаги дастлабки икки турда беш ва ундан кўп гол урган саноқли футболчилар қаторига кирди.
Бунгача бу каби натижани фақатгина аргентиналик Гильермо Стабиле (1930-йил, 5 та гол), венгриалик Шандор Кочиш (1954-йил, 7 та гол), француз Жюст Фонтен (1958-йил, 5 та гол) ва англиялик Гарри Кейн (2018-йил, 5 та гол) қайд этган эди.
Футбол бўйича Жаҳон чемпионати — 2026 мусобақалари 11-июндан 19-июлгача АҚШ, Канада ва Мексика майдонларида бўлиб ўтмоқда. Амалдаги жаҳон чемпиони Аргентина терма жамоаси ҳисобланади. Сайёрамиз биринчилигининг 2022-йилги финалида Аргентина миллий жамоаси Франция билан тўқнаш келган эди. Ўйиннинг асосий вақти 3:3 ҳисобида якунланган, бироқ пенальтилар сериясида аргентиналиклар кучлироқ чиққан эди (4:2).