«Лидс» мухлиси «МЮ»га қарши ўйин олдидан вафот этди

Англия Премьер-лигасининг 20-тури доирасида «Лидс Юнайтед» ва «Манчестер Юнайтед» ўртасидаги учрашув олдидан фожеали ҳодиса юз берди. «Элланд Роуд» стадионида ўйин бошланишидан аввал мухлислардан бири соғлиги тўсатдан ёмонлашиши оқибатида вафот этди. Бу ҳақда «Лидс Юнайтед» клуби ўзининг ижтимоий тармоқлари орқали маълум қилди.

«“Лидс Юнайтед” бугунги ўйин олдидан соғлиги тўсатдан ёмонлашиб, ҳаётдан кўз юмган мухлисимиз вафоти муносабати билан чуқур қайғу билдиради. Клубнинг барча ходимлари марҳумнинг оила аъзолари ва яқинларига ушбу оғир дамларда самимий ҳамдардлик изҳор этади», — дейилади клуб баёнотида.

Фожеали ҳолатларга қарамай, учрашув барибир ўтказилди ва томонлар 1:1 ҳисобидаги дуранг билан кифояланди.

Насрулло Каримов

Журналист