«Лейпсиг» Диоманд учун «Ливерпуль»дан 100 миллион евродан кўпроқ маблағ талаб қилмоқда
Германиянинг «RB Лейпсиг» клуби эндиликда «Ливерпуль» жиддий қизиқиш билдираётган вингер Ян Диоманд учун 100 миллион евродан кўпроқ маблағ талаб қилмоқда. Бу ҳақда журналист Филипп Хайнс хабар берди.
Манбанинг маълум қилишича, Бундеслига вакили энди футболчини сотиш орқали молиявий ҳолатини яхшилаб олишга эҳтиёж сезмаяпти. Бунинг сабаби жамоанинг келаси мавсум учун УЕФА Чемпионлар Лигаси йўлланмасини қўлга киритишга яқин тургани билан боғлиқ. Турнирда иштирок этиш учун бериладиган тўловлар клуб бюджетига сезиларли даражада қўшимча имконият яратади.
Чемпионат якунланишига тўрт тур қолганда «RB Лейпсиг» 59 очко билан учинчи ўринни эгаллаб турибди.
Бундан ташқари, «Лейпсиг» Диоманднинг шартномасини қайта кўриб чиқиш ва унинг маошини оширишни режалаштирмоқда. Клуб ивуарлик футболчини камида яна бир мавсум — 2027 йилнинг ёзигача ўз сафида сақлаб қолиш ниятида. Шунингдек, Диоманд «дахлсиз» ўйинчи ҳисобланмайди. Ҳаммаси келиб тушадиган таклифларнинг қай даражада бўлишига боғлиқ.
