Лаутаро Мартинес Аргентина афсонасини ортда қолдирди
Фото: Yahoo Sports
Лаутаро Мартинес Аргентина терма жамоаси тўпурарлари рўйхатида Диего Марадонани ортда қолдирди.
"Интер" ҳужумчиси ЖЧ-2026 саралашидан ўрин олган Венесуэлага (3:0) қарши ўйинда гол урди.
Натижада унинг Аргентина терма жамоасидаги голлари сони 33тага етди. У бу кўрсаткич бўйича Аргентина футболининг афсонаси Диего Марадонани ортда қолдириб, бешинчи ўринга чиқиб олди.
Эслатиб ўтамиз, ушбу натижага эришиш учун Мартинесга 71 та ўйин керак бўлди. Марадона 84 та ўйинда 32 та гол урган.
Мартинесдан олдинда Эрнан Креспо (35 гол, 64 ўйин), Серхио Агуэро (101 ўйинда 42 тўп), Габриэл Батистута (54 гол, 78 ўйин) ва Лионель Месси (114 гол, 194 ўйин) бормоқда.
Розикжон Султонмуродов
Журналист