Лапорта: «Флик «Барселона»ни хоҳлагандек бошқариши мумкин»
«Барселона» президенти Жоан Лапорта жамоанинг бугунги ўйинларидан кўнгли тўлмоқда. Клуб раҳбари бош мураббий Ханс-Дитер Флик ҳақида тўхталиб, германиялик мутахассис «кўк-анорранглилар»ни ўзи хоҳлагандек бошқариши мумкинлигини таъкидлади.
«Агар мен яна президент этиб сайлансам, Флик «Барселона»ни ўзи хоҳлагандек бошқаради. Биз учун бундай тажриба ва билимга эга инсоннинг жамоада бўлиши жуда муҳим эди. У нафақат феноменал мураббий, балки феноменал инсондир.
У билан шартнома имзолаган кунимиздаёқ жуда муҳим ишни амалга оширганимизни тушунгандик. Флик — суяк-суягигача мураббий! У ёш иқтидорлар ва тажрибали футболчиларни қандай бирлаштиришни, жамоани қандай бошқаришни жуда яхши билади. У ҳозирги «Барселона» учун идеал вариант. Флик туфайли биз жуда ёқимли даврни бошдан кечирмоқдамиз».
Эслатиб ўтамиз, Каталония клубида президентлик сайловлари яқинлашиб келмоқда. «Барселона»нинг янги раҳбари номи 2026 йилнинг март ойида маълум бўлади. Лапортанинг бу баёноти нафақат мураббийга ишонч, балки бўлажак сайловлар олдидан ўзига хос сайловолди ваъдаси сифатида ҳам кўрилмоқда.
