«Ланс» «ПСЖ»нинг илтимосига қарамай, Лига 1 доирасидаги ўйинни бошқа санга қолдиришдан бош тортди
«Ланс» клуби «ПСЖ»нинг 11 апрелга белгиланган ўйинни кўчириш борасидаги илтимосига рад жавобини берди. Парижликлар УЕФА Чемпионлар Лигаси чорак финали доирасидаги «Ливерпуль»га қарши баҳслар (8 ва 14 апрел) оралиғида қўшимча дам олиш вақти олиш мақсадида мурожаат қилишган эди. Бу ҳақда «Ланс» клубининг X ижтимоий тармоғидаги расмий саҳифаси хабар бермоқда.
«ПСЖ» томонидан Лига 1 нинг 29-туридан ўрин олган ушбу учрашувни кўчириш бўйича Профессионал футбол лигасига (LFP) юборилган расмий сўровдан сўнг, Ланс шаҳри жамоаси қатъий эътироз билдирди. Клуб тақвимни ўзгартириш учун ҳеч қандай асосли ёки адолатли сабаб йўқлигини таъкидламоқда.
LFP комиссияси ушбу масала бўйича якуний қарорни қабул қилиш учун пайшанба куни, 26 мартда йиғилиш ўтказади. Агар комиссия «ПСЖ»нинг талабини қондирса, «Ланс»нинг позицияси якуний қарорга таъсир кўрсата олмайди.
