«Ланс» президенти: «Биз АПЛ клуби учун фарм-жамоа бўлишни истамаймиз»
«Ланс» президенти Жозеф Угурлян клубга Англия клубларидан бири учун фарм-жамоага айланиш таклифи тушганини, аммо бу ғояни қатъий рад этганини маълум қилди.
«Буни тасаввур қилишнинг ўзи қийин! Ҳа, бизга шундай таклиф тушганди, аммо бу мен ҳеч қачон кўриб чиқмайдиган вариант. Бу клубнинг қадриятлари ва ДНКсига мутлақо мос келмайди.
Бизда ҳали оз бўлса-да куч бор экан, бундай йўлни танлашни истамаймиз. Балки мен қандайдир жиҳатдан нотўғри ўйлаётгандирман, аммо шахсан мен буни Франция футболи учун жуда ачинарли ҳолат деб биламан.
Биз — Франциямиз. Биз жаҳон чемпионатининг ярим финалчиси бўлган мамлакатмиз. Дунёда энг кўп футболчи етиштириб берадиган давлатлардан биримиз. Биз Англия Премьер-лигаси учун иккинчи даражали лига бўлиш эмас, балки ундан ҳам юксак мақсадларни кўзлашимиз керак», — деди Угурлян.
Эслатиб ўтамиз, «Ланс» 2025/26 йилги мавсумда Франция Кубогини қўлга киритди ҳамда Лига 1 чемпионатини иккинчи ўринда якунлади.
