Ламин Ямал фаолиятидаги илк хет-трини қайд этди
Испания Ла Лигасининг 26-туридан ўрин олган «Барселона» ва «Вильярреал» жамоалари ўртасидаги баҳс каталонияликларнинг 4:1 ҳисобидаги йирик ғалабаси билан якунланди.
Ушбу учрашув «кўк-анорранглилар»нинг 18 ёшли иқтидорли ҳужумчиси Ламин Ямал учун унутилмас кеча бўлди — футболчи ўз фаолиятидаги илк хет-трини расмийлаштирди.
Ямал учрашувнинг 28, 37 ва 69-дақиқаларида рақиб дарвозасини аниқ нишонга олиб, жамоасининг ишончли ғалабасини таъминлади.
Шуниси эътиборлики, ёш форвард бунгача бирор марта бир ўйинда икки тадан ортиқ гол уришга муваффақ бўлмаган эди. Ўзининг дебют хет-тринини Ламин «Барселона» либосидаги 140-учрашувида нишонлади.
Жорий мавсумда Ямал каталонияликлар сафида барча турнирлар доирасида 31 та ўйинда майдонга тушиб, 16 та гол урди ва 13 та самарали узатмани амалга оширди.
Ушбу ғалабадан сўнг «Барселона» 26 та ўйиндан 64 очко жамғарган ҳолда Испания чемпионати турнир жадвалида якка пешқадамликни давом эттирмоқда. «Вильярреал» эса 51 очко билан учинчи поғонада бормоқда.
