Кунде ва Балде «Атлетико»га қарши ўйинда майдонга тушиши мумкин
«Барселона»нинг ўнг ва чап қанот ҳимоячилари Жюль Кунде ҳамда Алекс Балде Испания чемпионати 30-туридан ўрин олган Мадриднинг «Атлетико» клубига қарши баҳсда майдонга тушишлари мумкин. Бу ҳақда Mundo Deportivo нашри хабар бермоқда.
Мазкур учрашув шанба, 4 апрел куни бўлиб ўтади.
Нашр маълумотларига кўра, каталонияликлар фулбеклари мушак жароҳатидан сўнг тўлиқ тикланиб, жамоанинг умумий машғулотларида иштирок этишни бошлашган. Шу билан бирга, «кўк-анорранглилар»нинг нидерландиялик ярим ҳимоячиси Френки де Йонгнинг ҳолати ҳамон сўроқ остида қолмоқда. Хавбек ўнг оёғидаги жароҳат сабабли бир ойдан ортиқ вақтдан бери майдонга туша олмаяпти.
Айни дамда «Барселона» 73 очко билан Ла Лига турнир жадвалида пешқадамлик қилмоқда. Мадриднинг «Реал» клуби 69 очко билан иккинчи, 57 очкога эга «Атлетико» эса тўртинчи ўринда бормоқда.
