Кунде «Арсенал»га ўтиши мумкин
Франциялик 27 ёшли ҳимоячи Жюль Кунде фаолиятини Лондоннинг «Арсенал» клубида давом эттириши мумкин. Бу ҳақда Diario Sport хабар берди.
Манбага кўра, «Арсенал» бош мураббийи Микель Артета Кунденинг трансферига шахсан қизиқмоқда. «Канонирлар» франциялик футболчини ҳимоя чизиғини кучайтириш учун муносиб номзод сифатида кўрмоқда.
Айни пайтда «Барселона» ҳам Кунде бўйича таклифларни кўриб чиқишга тайёр. Каталония клубига трансферлар учун қўшимча маблағ зарурлиги сабабли, жамоа айрим футболчиларини сотиш вариантларини ўрганмоқда.
Бироқ трансфердаги асосий тўсиқ — Кунденинг ўзи. Франциялик ҳимоячи ҳозирча «Барселона»ни тарк этишни истамаяпти ва Каталония клубида қолишни режалаштирмоқда. Унинг «Барселона» билан шартномаси 2030 йил ёзига қадар амал қилади.
