Кунде АПЛ грандлари эътиборида
Франциялик ҳимоячининг «Барселона» билан шартномаси 2030 йилга қадар амал қилади.
Фото: Getty Images
«Барселона» ҳимоячиси Жюль Кунде Англия Премьер-лигасининг бир қатор топ-клублари қизиқиш доирасига тушди.
Barca Universal нашри Sport манбасига таянган ҳолда хабар беришича, француз футболчисининг вазиятини «Арсенал», «Ливерпуль», «Челси», «Манчестер Сити» ва «Манчестер Юнайтед» диққат билан кузатмоқда.
27 ёшли Кунденинг ўзи эса клубни тарк этишга шошилмаяпти. У «кўк-анорранглилар» сафида фаолиятини давом эттиришни афзал кўрмоқда.
«Барселона» раҳбарияти футболчини сотиш вариантини кўриб чиқишга тайёр, аммо бу фақат клуб учун манфаатли таклиф тушган тақдирдагина амалга ошиши мумкин.
Transfermarkt портали Кунденинг бозор қийматини 55 миллион евро деб баҳоламоқда. Франциялик ҳимоячининг «Барселона» билан шартномаси 2030 йилга қадар амал қилади.
