Kunde APL grandlari e’tiborida
«Barselona» himoyachisi Jyul Kunde Angliya Premyer-ligasining bir qator top-klublari qiziqish doirasiga tushdi.
Barca Universal nashri Sport manbasiga tayangan holda xabar berishicha, fransuz futbolchisining vaziyatini «Arsenal», «Liverpul», «Chelsi», «Manchester Siti» va «Manchester Yunayted» diqqat bilan kuzatmoqda.
27 yoshli Kundening o‘zi esa klubni tark etishga shoshilmayapti. U «ko‘k-anorranglilar» safida faoliyatini davom ettirishni afzal ko‘rmoqda.
«Barselona» rahbariyati futbolchini sotish variantini ko‘rib chiqishga tayyor, ammo bu faqat klub uchun manfaatli taklif tushgan taqdirdagina amalga oshishi mumkin.
Transfermarkt portali Kundening bozor qiymatini 55 million yevro deb baholamoqda. Fransiyalik himoyachining «Barselona» bilan shartnomasi 2030 yilga qadar amal qiladi.
