Куала-Лумпур футбол федерацияси делегацияси Тошкентга ташриф буюрди
1-ноябр куни Куала-Лумпур футбол федерацияси (Малайзия) делегацияси президент Саид Язид Умар бошчилигида расмий ташриф билан Тошкентга келди.
Ташриф доирасида Куала-Лумпур футбол федерацияси (КЛФ) ва Тошкент футбол ассоциацияси (ТФА) ўртасида ҳамкорлик меморандуми имзоланди. ТФА номидан хужжатни Ассоциациянинг биринчи вице-президенти Азамат Абдураимов имзолади.
Меморандум имзоланишидан олдин меҳмонларга Тошкент футбол ассоциацияси фаолияти, шунингдек, Тошкент футболининг 100 йиллигини нишонлашга тайёргарлик кўриш бўйича тақдимот намойиш этилди.
Учрашувдан сўнг матбуот анжумани бўлиб ўтди, унда томонлар имзоланган меморандумда акс этган режа ва мақсадлар билан ўртоқлашдилар ва федерациялар ўртасидаги ҳамкорлик Тошкент ва Куала-Лумпур ўртасидаги футбол алоқаларини ривожлантиришда муҳим қадам бўлишига ишонч билдирдилар.
Ташриф давомида делегация Тошкент футбол академияси фаолияти билан яқиндан танишди ҳамда ёш футболчиларни ривожлантириш учун яратилган шароитларни юқори баҳолади.
Меҳмонлар академияда амалга оширилаётган ишлар, ўқув-машғулот жараёнлари ва инфратузилма билан танишар экан, Тошкентда футбол соҳасини ривожлантириш йўлида кўрилаётган чора-тадбирларга юксак эътироф билдиришди.
Энг сўнгги хабар ва янгиликларни sports24.uz сайти орқали кузатиб боринг.
