Кристиан Кофане Чемпионлар Лигаси тарихига кирди
«Байер» ҳужумчиси Кристиан Кофане УЕФА Чемпионлар Лигаси тарихига кирди. Squawka статистик портали маълумотларига кўра, 11 март, чоршанба куни Лондоннинг «Арсенал» клубига қарши 1/8 финал учрашувида асосий таркибда майдонга тушган 19 ёш 228 кунлик футболчи бир вақтнинг ўзида икки муҳим рекордни қайд этди.
Кофане «Байер» сафида Чемпионлар Лигасининг плей-офф босқичида асосий таркибда майдонга тушган иккинчи энг ёш футболчига айланди. Бу борадаги мутлақ рекорд 2017 йили Мадриднинг «Атлетико» клубига қарши ўйинда 17 ёш 255 кунлик бўлган Кай Хаверцга тегишли.
Шунингдек, Кристиан Кофане Камерунлик футболчилар орасида плей-офф баҳсларида асосий таркибда майдонга тушган иккинчи энг ёш ўйинчи сифатида қайд этилди. Мазкур йўналишдаги рекорд эса 19 ёш 191 кунида ушбу натижага эришган ҳимоячи Жоэл Матипга тегишли.
